Qaranlıq təhlükə: bağnazlıq: Qurana görə zinanın hökmü

Mündəricat

Zina barəsində Quranda verilən ilə hökm belədir:

Zinakar qadının və zinakar kişinin hər birinə yüz çubuq vurun.

Ayədə işlədilən “çubuq” kəlməsi, qalın bir çubuğu deyil, nazik bir çubuğu ifadə edir və Peyğəmbərimiz (s.ə.v)-in dövründə bu cəza bir-birinə bağlanmış yüz çubuqla tətbiq edilmiş, zina edən şəxsə bununla bir dəfə vurularaq bu hökm yerinə yetirilmişdir. Bundan savayı əsl vurğulanması lazım olan bir həqiqət də vardır ki, Quranda bu mövzu ilə bağlı digər açıqlamalardan, həmin bu çubuq cəzasının belə çəkindirmə məqsədi daşıdığı, praktikada tətbiq edilməsinin elə də mümkün olmayacağı başa düşülür:

İsmətli qadınları zinada günahlandırıb, sonra dörd şahid gətirməyən kəslərə səksən çubuq vurun və onların şahidliyini heç vaxt qəbul etməyin. Onlar fasiqlərdir.

Nur surəsi, 4

Ayədən də göründüyü kimi, bir qadının zina ilə günahlandırıla bilməsi üçün, onu zina edən vaxtı görən dörd nəfər şahid olmalıdır. Bu dörd nəfərin şahid olması üçün, onlar zinanın əvvəlini və ya sonrasını deyil, tam olaraq zina anını görməlidirlər. Çünki zinanın əvvəlini və ya sonrasını görüb bu iddia ilə ortaya çıxmaq yenə bir zənndir. Praktikada, zina anına şahid olan dörd nəfərin olması mümkün olmadığından, bunun sadəcə çəkindirici bir cəza olduğu asanlıqla başa düşülür.

Həmçinin bu ayədə zina böhtanı atmasına baxmayaraq, şahid gətirməyənlərə səksən çubuq vurulması cəzasının tətbiq edilməsi də böhtanın qarşısını alan çəkindirici hökmdür. Yenə başqa bir ayədə bir qadını zina ilə günahlandıran, lakin şahid gətirməyən şəxslərin Allah qatında yalançı sayılacağı bildirilir:

Nəyə görə onlar buna dair dörd şahid gətirmədilər? Madam ki, şahid gətirmədilər, deməli, onlar Allah yanında əsl yalançıdırlar.

Nur surəsi, 13

Göründüyü kimi, şahid gətirməyən bu şəxs iftira atmaqla və yalançılıqla təqsirləndirilir. Dolayısilə, həmin şəxsin doğru deyib-demədiyinin anlaşılması üçün yeganə etibarlı yol, onunla birlikdə zinaya şahid olmuş dörd şəxsin olmasıdır. Əks təqdirdə, sözü etibarlı olmayacaq.

Qurana görə zinanın hökmü belədir. Bu hökm aydın olub, olduqca ətraflı şəkildə açıqlanmışdır. Həmçinin rəcm cəzasından savayı tam fərqli bir üsul təsvir edilir. Ayənin bu açıq hökmünə baxmayaraq, İslama müxtəlif saxtakarlıqlarla rəcm vəhşiliyini daxil etməyə çalışanlar, çox böyük bir iftiranı boyunlarına götürürlər. Hazırda “İslam şəriəti” adı altında İran, Əfqanistan, Səudiyyə Ərəbistanı kimi ölkələrdə tətbiq olunan rəcm cəzası, həm İslama və Qurana ziddir, həm də cinayətdir. Bu ölkələrdə həmin bu üsulla açıq şəkildə İslam adından istifadə edilərək cinayət törədilir.