Мариям менен канча периште сүйлөшкөн?
Мариямдын периштелер менен сүйлөшкөнү айтылган аяттарда бир жерде бир гана периште болгону, экинчи жерде көптүк сандагы туюнтма болгону, демек бул эки аят тобунун ортосунда бир карама-каршылык пайда болгону ырасталат. Бул дооматтын чындыгын билүү үчүн адегенде аяттарды карап көрөлү:
Анан алар тарапка (өзүн жашырган) бир парда тарткан эле. Ошентип, ага рухубуз (Жибрилди) жиберген элек, ал да дурус бир адам кейпинде көрүнгөн эле. Айткан эле: “Чындыгында мен сенден Рахманга (болгон Аллахка) корголойм. Эгер такыба болсоң (мага жакындаба).”Айткан эле: “Мен болгону Раббиңден (келген) бир элчимин; сага таптаза бир эркек бала белек кылуу үчүн (бул жердемин).” (19 Мариям сүрөсү – 17/19)
(Закария) “Раббим, мага бир белги (аят) бер.” деди. “Сага белги, ишараттан башка, адамдар менен үч күн сүйлөшпөшүң. Раббиңди көп зикир кыл жана кечинде, эртең менен Аны тасбих кыл.” деди. Кезинде периштелер: “Мариям, албетте Аллах сени тандады, сени тазалады жана ааламдардын аялдарынан артык кылды.” деген эле. “Мариям, Раббиңе чын жүрөктөн моюн сун, сажда кыл жана рүкүү кылгандар менен бирге рүкүү кыл.” (3 Аали Имран сүрөсү – 41/43)
Бул эки аят тобу окулганда эки башка окуя баяндалганы көрүнөт. Мариям сүрөсүндөгү аяттарда Мариямдын Жебрейил менен жолукканы жөнүндө сөз болот. Аали Имран сүрөсүндөгү аяттарда болсо баяндалган нерсе башка окуя. Бул жерде башка жерде, башка убакта Мариям менен периштелердин сүйлөшкөнү жөнүндө сөз болот. Демек, бир жерде көптүк сандагы периштелер жөнүндө сөз болушу менен экинчи жерде бир рух (Жебрейил) жөнүндө сөз болушунун ортосунда карама-каршылык жок.