Күйөөсү өлгөн аялдын күтүү мөөнөтүнө байланыштуу аяттарда карама-каршылык жок

Күйөөсү өлгөн аялдын абалына байланыштуу кээ бир өкүмдөр Куранда билдирилет. Бул маселеде өкүмдөр билдирилген аяттарда карама-каршылык бар деп ырасталууда. Бул аяттардын биринде бир жылдык мөөнөт жөнүндө айтылса, экинчисинде төрт ай он күндүк мөөнөт жөнүндө айтылат. Мөөнөттөр ар башка болушу карама-каршылык катары көрсөтүлүүгө аракет кылынса да, аяттарда баяндалган маселелерге караганда карама-каршылык жок экени көрүнөт. Анткени мөөнөттөрдүн ар башка болушунун себеби, жесир калган аялдар үчүн ар башка маселелерде ар башка мөөнөттөр билдирилгенинен келип чыгат. Бул маселеге байланыштуу аяттар мындай:

وَٱلَّذِينَ يُتَوَفَّوْنَ مِنكُمْ وَيَذَرُونَ أَزْوَٰجًا وَصِيَّةً لِّأَزْوَٰجِهِم مَّتَٰعًا إِلَى ٱلْحَوْلِ غَيْرَ إِخْرَاجٍ فَإِنْ خَرَجْنَ فَلَا جُنَاحَ عَلَيْكُمْ فِى مَا فَعَلْنَ فِىٓ أَنفُسِهِنَّ مِن مَّعْرُوفٍ وَٱللَّهُ عَزِيزٌ حَكِيمٌ

Өлүп, артында жубайларын калтырган эркектериңер, жубайлары үйлөрүнөн чыгарылбай бир жыл бою жашоо каражаты камсыз кылынышын осуят кылышсын. Чыгып кетишсе, өздөрү үчүн ылайыктуу нерсени кылганына силер жооптуу эмессиңер. Аллах – Күчтүү, Акылман. (2 Аль-Бакара сүрөсү – 240)

وَٱلَّذِينَ يُتَوَفَّوْنَ مِنكُمْ وَيَذَرُونَ أَزْوَٰجًا يَتَرَبَّصْنَ بِأَنفُسِهِنَّ أَرْبَعَةَ أَشْهُرٍ وَعَشْرًا فَإِذَا بَلَغْنَ أَجَلَهُنَّ فَلَا جُنَاحَ عَلَيْكُمْ فِيمَا فَعَلْنَ فِىٓ أَنفُسِهِنَّ بِٱلْمَعْرُوفِ وَٱللَّهُ بِمَا تَعْمَلُونَ خَبِيرٌ

Араңардан өлгөн эркектердин артында калган жубайлары төрт ай жана он (күн) күтүшөт. Мөөнөттөрүн толтурганда, өздөрү үчүн ылайыктуу нерсени кылганына силерге жоопкерчилик жок. Аллах кылганыңардан Кабардар. (2 Аль-Бакара сүрөсү – 234)

Аль-Бакара сүрөсүнүн 240-аятында билдирилген маселе – жесир калган аялдардын күйөөлөрүнүн үйүндө бир жыл калуу укугу бар экенинин билдирилиши. Күйөөсү өлгөндөн кийин мурас бөлүштүрүүдө күйөөгө таандык үй башка адамдарга мурас болуп калышы мүмкүн. Бул учурда аялдын бул үйдө бир жыл жашоо укугу бар. Мындан тышкары анын жашоо каражаты да камсыз кылынышы керек. Аль-Бакара сүрөсүнүн 234-аятында болсо күйөөлөрү өлгөн аялдардын төрт ай он күн күтүшү жана бул мөөнөттүн ичинде никеге турбашы буюрулган. Демек, эки аятта аял үчүн эки башка абал боюнча өкүм билдирилгени көрүнөт. Аят маселелери менен кунт коюп изилденгенде карама-каршылык жок экени ачык.